Анонс спектакля “Айыы аймах биһигэ”

16.05.2024

Дьокуускай куорат олохтоохторун уонна ыалдьыттарын Оһуохай күнүгэр анаан Сергей Зверев-Кыыл Уола аатынан Үҥкүү тыйаатыра ыам ыйын 27 күнүгэр киэһэ 18:30 аҥар чааска “Айыы аймах биһигэ» испэктээххэ ыҥырар.

«Айыы аймах биһигэ» испэктээк саха төрүт үҥкүүтэ оһуохай төрүттэниитин, оһуохайы таһаарааччылар удьуорунан утумнаан көлүөнэттэн көлүөнэҕэ тиэрдиилэрин, хаалларыыларын туһунан ойуулаан көрдөрөр. Олох көстүүтүн курдук, оһуохай эмиэ бэйэтэ устуоруйалаах. Өрө тахсар уонна таҥнастар түгэннэрдээх, хааччахтанар уонна биһирэнэр кэмнэрдээх. Сюжекка дойду устуоруйатын кэрдиис кэмнэригэр норуот фольклорун илдьэ сылдьааччы – дьиэ кэргэн олоҕо ойууланар. 2022 сыллаахха саханы саха дэтэр оһуохайбыт Киһи аймах тылынан уонна өйүнэн айбыт Арассыыйа култуурунай нэһилиэстибэлэрин чулуу айымньыта буолбута.

Испэктээк саҕаланыытыгар аҕа баһылыкпыт Эллэй салайар кэмэ, бастакы ыһыах тэриллиитэ, алгыс, оһуохай күн эргиирин устун хаамыылаах үҥкүүбүт көстөр. Онтон 1922 сыл – Саха АССР тэриллиэҕиттэн күн бүгүҥҥэ дылы, уһун 100 сыллаах саха норуот олоҕо…

Муусуканан киэргэтии – Илья Петухов, либретто ааптара уонна режиссер – Дария Григорьева, туруорааччы хореографтар – Долаана Федотова, Людмила Антипина. Юрий Федоров, туруорааччы худуоһунньук – Екатерина Шапошникова, научнай консультант – Ангелина Лукина.

Сүрүн оруолларга:

Эллэй – Николай Павлов

Үрүҥ Айыы Тойон – Василий Эверстов

Айыыһыт – СӨ култууратын туйгуна Лариса Васильева

Иэйиэхсит – СӨ култууратын үтүөлээх үлэһитэ Лена Алексеева-Ким

Күрүө Дьөһөгөй – Сергей Алексеев

Ааныс – СӨ култууратын туйгуна Ульяна Ядреева

Ньукуус – Сергей Алексеев

Удаҕан – Саскылана Жиркова

Уоллаах кыыс хомсомуоллар – Алексей Максимов, СӨ култууратын туйгуна Анна Попова

Мэхээс – Аан дойдутааҕы күрэх лауреата Капитон Ильин

Груня – Саяна Егорова