“Күн Боотур” олоҥхо оҕолорго ананна

Бүгүн Олоҥхо күнүгэр Саха норуодунай артыыһа Дмитрий Артемьев уонна ырыаһыт, хомусчут-импровизатор Василена Шарина-Улан Саха политехническай лицей уонна Оҕо дыбарыаһыгар баар оскуола алын сүһүөх кылаас үөрэнээччилэригэр “Күн Боотур” куукуланан дьүһүйүллэн туруоруллубутт олоҥхо испэктээги көрдөрдүлэр. Куукулалары Светлана Андросова худуоһунньук бэйэтэ эскиистээн, бэйэтэ тигэн, симээн, киэргэтэн оҥорбута. Бу испэктээк премьерата 2016 с. буолбута. Оччолорго хоту улуустарга гостуруол кэмигэр этэ.

Санатан эттэххэ идея ааптара Дмитрий Артемьев. Фольклор салаатын артыыстара биир бэйэлэрэ хас да дьоруой уобараһын толороллор. Үгэс быһыытынанн аллараа дойду адьарайа Арсан Дуолай бэйэтин боотурдарын кытары Айталы Куону уоран ылаллар. Дьэ, ону хас эмит күннээх уонна түүннээх уоттаах кыргыһыы кэнниттэн Күн Боотур быыһаан, Орто дойдуга илдьэ кэлэр. Инньэ гынан Орто дойдуга үөрүү-көтүү, кыайыы-хотуу, уруу ыһыаҕын тэрийэн, Айталы Куону Эрчимэн Бэргэҥҥэ кэргэн биэрэллэр, уруу тэрийэллэр. Бүтэһигэр бука бары артыыстар уонна көрөөччүлэр илии-илиилэриттэн ылсыһан оһуокайдаан ойоллор, эһиэкэйдээн эйээрэллэр.