“Алыптаах Хомус” оҕо уһуйааныгар
Бүгүн үҥкүүһүттэр “Алыптаах Хомус” оҕо испэктээги “Золотинка” уһуйааҥҥа иккитэ көрдөрдүлэр. Тыйаатырга айымньылаахтык үлэлии-хамныы сылдьар ырыаһыт уонна импровизатор-хомусчут Василена Шарина-Улан ийэтинээн Марфа Николаевналыын-Сигуна Сэбээк Күннүүн айан таһаарбыт кинигэлэригэр олоҕуран режиссер Розалия Тартакинова туруорбута. Муусукатын дирижер Анюта Иванова талбыта.
Ис хоһооно: дьиэ кэргэттэр Сырдыкчааналаах Болуйа ыал буолан, алаһа дьиэ тэринэн, бур-бур буруо таһааран олорбуттара балачча буолбут да оҕолоро суох эбит. Кинилэр онтон олус санаарҕыыллар, курутуйаллар эбит. Биир үтүө күн, сарсыарда кинилэр үөһэ айыылартан оҕото биһиэхэ ыытын диэн көрдөспүттэр. Үөһэ айыылар быһа гымматахтар, сып-сырдык, дьэдьэн курдук тэтэркэй сирэйдээх кыыс оҕону кинилэргэ ыыппыттар. Төрөппүттэр үөрүүлэрэ, махталлара муҥура суох. Кустукчаана диэн мааны кыыстарыгар аат биэрбиттэр. Бары эйэлээхтик, истиҥ сыһыаннаахтык олорбуттар. Кустукчаана балачча улааппыт, сүрдээх сүрэхтээх, оттомноох, дьонугар илии-атах буолан, көмөтөлөөх-туһалаах оҕо эбит.
Ол олордохторуна эмискэ хантан да кэлбитэ биллибэт ыарахан ыарыы бүрүүкээбит. Сорох дьоннор өлөн-быстан барбыттар. Кустукчаана бу иэдээнтэн дьоннорун өрүһүйээри, кинилэри быыһаары, ыарахаттартан чаҕыйбакка, уһун суолга турунар. Айаҥҥа Үөһээ дойду айыыларын кытта билсэр. Айыылар киниэхэ туһаайаннар сорудахтары биэрэллэр, суол-иис ыйаллар, сүбэлииллэр-амалыыллар. Кустукчаана бары мэһэйдэри туораан, сорудахтары эҥкилэ суох толорон кинилэргэ төннөр. Айыылар махталларын бэлиэтигэр Кустукчаанаҕа хомус бэлэхтииллэр, хомустара буоллар аптаах, алыптаах эбит. Кустукчаана олуһун үөрэр. Кини хомус тыаһынан дьону-сэргэни угуттуур, ыраастыыр, эмтиир, улахан ыарыыны үүрэр.
Олохтоохтор үөрэллэр-көтөллөр, дьоллоноллор, саҥалыы олохторун оҥостоннор, дьиэлэрин-уоттарын ыраастананнар, эйэ дэмнээхтик олороллор. Кустукчаана оруолун кинигэ ааптара Василена Шарина-Улан толордо. Остуоруйа кэпсээччитэ – Дмитрий Артемьев. Атын оруоллары үҥкүүһүттэр үрдүк таһымнаахтык толородулар. “Золотинка” уһуйаан оҕолоро остуоруйаны сэргэхтик ылыннылар. Дьоруойдары кытта бииргэ буоллулар, дэлби ытыс тыаһынан махтаннылар.