45-с театральнай сезон бастакы аҥара түмүктэриттэн быһа тардыы
Сахам сирин дьонун-сэргэтин кэлэн иһэр саргылаах 2025 сылынан Сергей Афанасьевич Зверев-Кыыл Уолун аатынан Үҥкүү тыйаатырын кэлэктиибин аатыттан итии-истиҥ эҕэрдэбитин ыытабыт!
Быйылгы 45-с театральнай дьыл балаҕан ый бүтүүтэ алтынньы ый саҕатыгар үрдүк таһымнаах научнай-сырдатар экспедицияттан саҕаламмыта. Тыйаатыр дириэктэрэ Александр Иванович Алексеев, сүрүн балетмейстер Долаана Чындаевна Федотова, балетмейстер Юрий Михайлович Федоров уонна Красноярскайтан кэлэ сылдьар суруйааччы Николай Алексеевич Юрлов Сергей Афанасьевич Зверев-Кыыл Уола 2025 сылга төрөөбүтэ 125 сылыгар анаммыт Сунтаар улууһугар айаннаан тиийэннэр элбэх көрсүһүүлэргэ, тэрээһиннэргэ, Өрөспүүбүлүкэ таһымнаах мунньахха кыттыбыттара. Чинчийбит элбэх матырыйаалларын барытын сааһылаан, хомуйан аҕалбыттарын үүнэр сыл үбүлүөйдээх тэрээһиннэригэр туттар былааннаахпыт.
Быйыл Үҥкүү тыйаатыра 45-с театральнай сезон аһыллыытын улахан кэнсиэринэн алтыннььы 31 күнүгэр үөрүүлээх быһыыга-майгыга, Нуучча тыйаатырыгар толору көрөөччүлээх саалаҕа аспыта.
Биллиилээх суруйааччы Александр Пушкин төрөөбүтэ 225 сылыгар “Белкин сэһэннэрэ” диэн пластическай испэктээк премьерата турбута. Бу испэктээккэ 5 сэһэн барыта киирбитин эдэр балет артыыстара үрдүк таһымнаахтык толороллор. Бу күһүн Покровскай уонна Дьокуускай куорат оскуолаларыгар уонна Нуучча тыйаатырыгар ситиһиилээхтик көрдөрдүлэр.
Быйыл Саха сиригэр Оҕо сыла биллэриллибитинэн оҕо аудиториятыгар улахан болҕомто көрөммүт элбэхтик оҕо испэктээктэрин көрдөрдүбүт. “Биэс бэһиэлэй ынахтаах Бэйбэрикээн эмээхсин”, “Алыптаах Хомус”, “Айболит Луохтур”, “Күн Боотур” үҥкүүнэн дьүһүйүллүбүт испэктээктэри уһуйааннар оҕолоро, алын сүһүөх кылаастар үөрэнээччилэрэ бэрткэ сөбүлээн көрдүлэр –иһиттилэр.
Өр сыллар устата саха аркыастыра Ф.И.Авдеева аатынан айымньытын дыбарыаһын норуотунай аркыастырын кытары ситиһиилээхтик хас да бырайыактары айан тэрийэн ыыттылар. Быйыл “В кругу семьи” бырайыак эмиэ бэрт элбэх интириэһинэй кыттааччылары мунньан көрөөччү биһирэбилин уонна билиниитин ылыан ылла.
Саха аркыастыр “Я люблю тебя Россия” бырайыага наар өрө көтөҕүллэн үөрүүлээх быһыыга-майгыга ааһар. Быйыл да бу бырайыагы профилакторий, санаторий сынньанааччылара, пенсионердар, бэтэрээннэр бэрт сылаастык ылыннылар.
Дэгиттэр талааннаах, фольклор хас да көрүҥүн баһылаабыт артыыс Александр Карманов “Дьиэрэй ырыам” сольнай кэнсиэрэ саха аркыастыр доҕуһуолунан үрдүк таһымнаахтык буолан ааста.
Тыйаатыр биир тумус туттар киһитэ, СӨ норуотунай артыыһа Дмитрий Артемьев Бүтүн Арассыыйа улахан тэрээһинигэр Москубаҕа онтон Киров куоракка туох баар регионнартан Мороз оҕонньоттор Хаарчааналарын кытта мустан кэлэн иһэр Саҥа дьылы уруйдуур-айхаллыыр тэрээһиҥҥэ Саха сирин тымныы Чысхаан кырдьаҕаһа буолан эҕэрдэлээтэ.
Биир умнуллубат үтүө түгэнинэн “Кыл Саха” төрүт дорҕоон бөлөх тэриллибитэ 10 сылыгар анаммыт “Кыл Саха Оһуора” кэнсиэр буолла. Бу бөлөх биир идэлээхтэрин, айар куттаах артыыстары, дэгиттэр талааннаах дьону-сэргэни мунньан хатыламмат төрүт дорҕоон улахан бырааһынньыга буолан үөрүүлээх быһыыга-майгыга ааста.
Саҥа дьыл иннигэр “Эрбэхчэй уонна Сааскылаана” диэн үҥкүүнэн дьүһүйүллүбүт оҕо остуоруйатын кырачаан көрөөччүлэрбит бэрт чугастык, үөрэ-көтө ылыннылар.
Уонна ахсынньы 26 күнүгэр “Сүктүү” испэктээк сүрэхтэннэ, күн сирин көрдө. Инньэ гынан ааһан эрэр 45-с театральнай сезон бастакы аҥара сүрдээх тэтимнээх уонна хорутуулаах.
Күндү көрөөччүлэрбитигэр Саҥа дьылга ис сүрэхтэн күн сиригэр баар бары кэрэни, сырдыгы, ырааһы баҕарабыт!
Вера Черноградская