Бу ый биир кэрэхсэбиллээх сонунун үллэстэбит: муус устар 9-10 күннэригэр Дьокуускай куоракка РСФСР култууратын үтүөлээх үлэһитин, СССР суруйааччыларын сойууһун чилиэнин, Саха АССР искусстволарын үтүөлээх диэйэтэлин, Үлэ Кыһыл знамя уордьанын икки төгүллээх кавалерын, Сунтаар улууһун Ытык олохтооҕун, норуот ырыаһытын Сергей Афанасьевич Зверев – Кыыл Уолун сүдү талааныгар сүгүрүйэн, 125 бэлиэ сылынан «ТОҔУС ОҺУОРДААХ ТҮҺҮЛГЭ» өрөспүүбүлүкэтээҕи норуот уус-уран айымньытын күрэһигэр «Саха ыллыыр ырыата» дэгэрэҥ ырыа күрэһэ (улахан дьоҥҥо биирдиилээн кыттааччыларга) I үрдэли уонна «Кэскиллээх тойуксут» АНАЛ ААТ кыайыылааҕа үрдүк ааты С.А.Зверев-Кыыл Уола аатынан СӨ Үҥкүүтүн тыйаатырын ырыаһыта Александр Андреевич Карманов ситистэ. Бу үөрүүлээх, умнуллубат түгэннэринэн биир идэлээхпитин, тыйаатыр артыыһын итиитик-истиҥник эҕэрдэлиибит уонна айар үлэҕэр ситиһиилэри, тус олоххор дьолу баҕарабыт!
