С. Зверев – Кыыл Уола аатынан Саха Өрөспүүбүлүкэтин үҥкүүтүн тыйаатырын дириэктэрэ Саргылана БОРИСОВА уонна киинэ, тыйаатыр режиссера Сергей ПОТАПОВ Саха телевидениетигэр сарсыардааҥы «Саҥа күн» биэриигэ кыттыыны ыллылар.
Биэриигэ үҥкүү тыйаатырын 46-с айар дьылыгар былааннарын уонна буолаары турар Кыыл Уола олоҥхотугар олоҕурбут «Кынчарҕаннаах харахтаах кырыылаах сутуруктаах Кыыс Кыыдаан бухатыыр» үҥкүүнэн дьүһүйүллүбүт испэктээк сүрэхтэниитин туһунан сиһилии сырдаттылар.
Бэлиэтээн эттэххэ, быйылгы испэктээк режиссер Сергей ПОТАПОВ уонна үҥкүү тыйаатыра иккис холбоһуктаах үлэлэрэ буолар. Маҥнайгы бииргэ оҥоһуллубут үлэ – 2010 сыллаахха «Оргуһуохтаах Кыыс» испэктээк дьон дьүүлүгэр тахсыбыта.
Санатан эттэххэ, балаҕан ыйын 24-25 күннэригэр Саха тыйаатырын сыанатыгар «Кынчарҕаннаах харахтаах кырыылаах сутуруктаах Кыыс Кыыдаан бухатыыр» үҥкүүнэн дьүһүйүллүбүт испэктээк сүрэхтэниэҕэ. Билиэттэр Саха тыйаатырын кассатыгар уонна «Most» сыһыарыыга атыыланаллар.
