Муус устар 3 күнүгэр “Сэргэлээх уоттара” култуура киинигэр С.А.Зверев-Кыыл Уолун аатынан Үҥкүү тыйаатырын ырыаһыта уонна хомусчут-импровизатора Василена Шарина-Улан “Турук” диэн тыйаатыр репертуарыгар бастакынан ыытыллыбыт моно-перфоманс айар киэһэтэ толору сааланы хомуйан, өрө көтөҕүллэн, үөрүүлээх быһыыга-майгыга буолан ааста.
Култуура киинигэр атыллыыргын кытары сахалыы, кылбаа маҥан таҥастаах Далбар Хотуттар көрөөччүлэри алгыстаах алаадьынан, быырпаҕынан көрүстүлэр, күндүлээтилэр. Василена күн күбэй ийэтэ Марфа Николаевна мичилийэ-мичилийэ, бэйэтинэн алаадьылаан, сыт таһааран, дьон-сэргэ кини диэки тардыстылар, алаадьыны амсайан үөрдүлэр-көттүлэр. Кинилэр ыһыаҕы санаттылар, мустубут дьону хара маҥнайгыттан ураты турукка киллэрдилэр.
Моно перфоманс быһыытынан Василена чорон соҕотох бэйэтэ “Сэргэлээх уоттара” киэн-куон уораҕайын алгыһынан, ырыанан, оһуокайынан, сээдьэнэн, дьүрүскэннээх хомуһунан толорон кэбистэ. Кини Орто Халыма Сыбатаайыттан төрүттээх. Хоту дойду хоодуот кыыһа диирим оруннаах. Хас биирдии нүөмэрэ ураты күүстээх, төлөннөөх, ис иһиттэн сэниэлээх, хатыламмат кэрэ көстүүлээх.
Кэнсиэр дьыл кэминэн араарыллан турбут уонна Василена алгыһынан уонна махталларынан – “Махтал өбүгэлэргэ”, “Махтал төрөппүттэргэ”, “Махтал айылҕаҕа” уонна “Махтал тус бэйэҕэр”. Ол барыта улахан экраҥҥа толору көһүннэ, Василена толорор нүөмэрдэрин барытын күүһүрдэн, сиһилии толорон биэрдэ. Көрөөччүлэр кырыа кыһыны, дьүкээбил дьиримниир уоттарын, киэн нэлимэн туундараны, саас сыта сайа охсорун, аламай күн сыламын, айылҕа сиппитин-хоппутун, сардааналаах алаастары, күһүҥҥү быйаҥы алгыһы кытары иҥэриннилэр.
Василена айар киэһэтэ таһыма үрдүктүк барарыгар туох баар күүһүн-күдэҕин, билиитин-көрүүтүн, уопутун, туох баар дьоҕурун, биир идэлээхтэрин көмөтүн, сүбэтин-аматын барытын туһанна. Ити чэрчитинэн хас да улуус оһуокайын араас көрүҥнэрин иһитиннэрдэ, саҥа ырыалары сүрэхтээтэ, чабырҕаҕа да саҥа тыынынан ырыа былаастаан толорулунна. Хореграфтар Долаана Федотова уонна Катерина Захарова бу моно-перфоманска анаан туруорбут үҥкүүлэрин көрдөрдө.
Василена моно-перфоманс сүрэхтэниитигэр күүс көмө буолбут тэрилтэлэргэ «Уруу» ювелирнай хампаанньаҕа, «Сибэкки Светлана» фирмаҕа, «Айар уустарга», режиссеругар Изабелла Егорова-Мынайга, худуоһунньугар Туйаара Стручковаҕа, «Арчы» дьиэтигэр А.С.Федоровка айыы үөрэҕин бииргэ барбыт үөлээннээхтэригэр, бэйэтин тыйаатырын үлэһиттэригэр, олохтон туораабыт тыйаатыр дириэктэригэр Александр Иванович Алексеевка махтала муҥура суох.
Икки чаастаах моно-перфоманс “Турук” биир тыынынан буолан ааста уонна Геннадий Семенов “Ураанхайдар” оһуокайынан турукка киирбит көрөөччүлэри кытары түмүктэннэ.
Эҕэрдэ Василена, айар киэһэн үтүө түмүктэммитинэн уонна саҥа иккис Улан Инчэҕэй Хаар диэн ааккынан. Иннин хоту киэҥник хардыылаан баран ис, айар-тутар үлэҕэр үтүмэн элбэх ситиһиилэри, тус олоххор дьолу-соргуну, күн күбэй ийэҥ Марфа Николаевна, аҕалаатар аҕан Иван Александрович, быраатын Николай, оҕолорун Боотур уонна Дархан тапталларынан угуттанаҥҥын саҥаттан саҥа саҕахтарга айаннаа!
Вера Черноградская
