Кыыл Уолун аатынан Үҥкүү тыйаатырын биир тутаах киһитэ, Саха Өрөспүүбүлүкэтин норуодунай, Российскай Федерация үтүөлээх артыыһа Дмитрий Артемьев, СӨ саллааттарын ийэлэрин кэмитиэтин бэрэссэдээтэлэ Емельянова Мария Егоровналыын Амурскай уобалас, Приморье байыаннай чаастарыгар сулууспалыыр саллааттарга, мотуруостарга алгыс, олоҥхо, оһуохай аргыстаах, алаадьы, быыппах, собо миинэ кэһиилээх ыалдьыттаан кэллилэр. Бу көрсүһүүлэр бары даҕаны дойдуга ахтылҕан санаалаах, иһирэх истиҥ сыһыан арыаллаах, ис сүрэхтэн махтал туруктаах аастылар.
