Александр Иванович Алексеев, саха үҥкүүтүн нөҥүө, Сахабыт сирин аан дойду араас тас дойдуларыгар, континеннарыгар таһаарбыт, биллэрбит дьиҥнээх саха патриота буолар. Тус бэйэтин олоҕун сахалыы үҥкүү, музыка үрдүк таһымҥа тахсарыгар, сайдарыгар анаабыта, толук уурбута да диэххэ сөп. Үҥкүү Национальнай Театра, тэриллиэҕиттэн билиҥҥэээҥҥэ дылы, саҥаттан саҥа испэктээктэри, далааһыннаах кэнсиэрдэри туруоран, көрөөччү, норуот дьүүлүгэр таһаарарыгар, Александр Иванович төһөлөөх өйүн-санаатын, кыһамньытын уурбута буолуой, ону билигин сэрэйиэххэ эрэ сөп.
Биирдэ, 2024 сыллаахха, сайыммыт саамай куйаас күнэ турдаҕына, мин үлэбиттэн тахсыбытым, арай, Александр Иванович, И.Н.Барахов скверин аттынан ааһан иһэн, тохтоон, үөһэ хантайан, биһиги тэрилтэбит ыйаабыт баннерын одуулуу турар эбит. Харахпар бу баар: Александр Иванович сып сырдык таҥастаах, чараас үрүмэ курдук үрүҥ сэлээппэлээх, ис иһиттэн үөрбүт аҕай уонна маннык дии түстэ: “Туймаадаларга” махтана турабын, куораппытын сахалыы тыыннаах көстүүнэн киэргэппиккитигэр. Киһи дууһата тохтуур, уоскуйар сирэ буолбут манна”. Онтон дьэ, биһиги, 1946 сыллаахха Михаил Михайлович Носов “Танец древних якутов” уруһуйдаан хаалларбытыгар махтаммыппыт, иккиэн сөбүлүүр хартыынабыт туһунан утары көрөн туран, дэлби ис сүрэхпититтэн кэпсэппиппит. Александр Иванович профессионал быһыытынан, Оһуохай үҥкүүтүн туһунан иэйэн-куойан туран кэпсээбитэ. Онтон: “ Бу хартыынаҕа, Аал Луук Мас — саха дьоно биир санаанан, биир хайысханан, биир тэҥҥэ хамсанан, үтүө санааларын үрдүк айыыларга ыыппыт эрчимнэриттэн тиллибит Ытык мас, Светлана Матвеевна”, — диэн тоһоҕолоон эппитэ испэр иҥэн сылдьар. «Иван Николаев – Уххан «…Туругура тур, ыллыыр ырам ытык хочото, Туймаада!» суруйтарбытын саамай сөп, ити символ», — диэн быһаарбыта. Кини инник өрүүтүн бэйэтин билиитин, санаатын, олоххо көрүүтүн дьоҥҥо этэр, ырааһы-сылааһы тарҕатар, дууһаны сымнатар киһи этэ…
Светлана Матвеевна Пинигина, СӨ култууратын үтүөлээх үлэһитэ, “Туймаада” ырыа ансаамбыл салайааччыта
