Мин Марфа Никитична Алексеева Үҥкүү тыйаатырыгар үлэлээбитим номнуо 22 сыл буола оҕуста. Иистэнньэҥинэн үлэҕэ киириэхппиттэн дириэктэринэн улэлээн кэлбит Александр Иванович наҺаа культурнай, өрөбүлэ суох улэһит, киһи киэнэ килбиэннээҕэ кини этэ диэн истиҥник саныыбын. Хас биирдии үлэһитигэр кыһамньылаах сыһыанын, көмөтүн-сүбэтин ааҕа да барбаккын.
Александр Иванович иистэнэр сыахтааҕынан наһаа киэн туттарын, иистэнньэҥнэрин өрө тутарын олус биһириирбит, үөрүү көтөллөөх күммүтүн атаарарбыт. Биһиги үлэбитин сыаналаан өрүү махтанара, омуна суох сыах улэһиттэрин олус таптыыр этэ.
Александр Иванович сыахха күн аайы киирэн үлэ хаамыытын, туох ханнык настроениелаахпытын, туох сонуннаахпытын, хайаан да көрөн-истэн, кэпсэтэн-ипсэтэн, быһаарсан тахсар үгэстээҕэ.
Биир үчүгэйэ диэн сыахха үлэ элбээтэҕинэ, хайаан да кыргыттар күүстэ киллэриниҥ, сэниэтэ эбиниҥ диэн минньигэс астары киллэрэн остуолбутугар уурара бу баарга дылы. Уонна хайаатар да күнүс киирэн барыбытын туруоран, эти хааны уһугуннарар, күүрэ быһыытыйбыт сүһүөхтэрбитин имитэн, зарядка оҥотторон барара. Күнү-күнүнэн олорон иистэнэр дьону олус абырыыр этэ. Мэлдьи кыргыттар хамсаныҥ, хааҥҥыт курулаччы суурдэҕинэ сэниэ киириэ, утуктаабыккыт ааһыа, үлэ өссө таһаарыылаахтык тахсыа диирэ.
Александр Иванович хаһан да аҥардас үлэнэн эрэ ыкпакка, дууһалыын сылаанньыйар, истиҥи иһийэр иһирэх кэпсэтиилэри, түгэннэри бэлэхтиирэ. Ол курдук хас бырааһынньык, хас төрөөбүт күннээҕи барытын санаан, иистэнэр сыахха киһи долгуйарын курдук үөрүүбүтүн тэҥҥэ үллэстэрэ, эҕэрдэлиирэ. “Кыргыттар” — диэбитинэн киирэн кэлэрэ бу баарга дылы.
Александр Иванович олоҕун бүтэһик күнүгэр дылы тыйаатырын туһугар тахсар боппуруостары быһаарсан баран эмискэ, наһаа соһумардык уонна хомолтолоохтук күн сириттэн күрэннэ. Мин Александр Ивановиһы куруутун өйдүү-саныы сылдьыам, кини үлэтигэр бэриниилээҕин, үлэһиттэригэр үтүө сыһыанын. Кини олоҕун, туох баар күүһүн-күдэҕин, билиитин-көрүүтүн, баай уопутун барытын Үҥкүү тыйаатыра сайдарыгар анаата.
Марфа Алексеева, иистэнньэҥ, СӨ култууратын туйгуна, 21.03.2025с.