Мин, Анатолий Алексеевич Алексеев үгүһү-элбэҕи эппэккэ, тыйаатырга Александр Ивановиһы кытары алтыспыт кэмнэрбин быһа тардан сэһэргиэм. Биһиги тыйаатырбыт А.Е.Кулаковскай-Өксөкүлээх Өлөксөй аатынан оччотооҕута Култуура дыбарыаһыгар хаҥас өттүгэр иккис этээскэ базаланан олохтоммуппут.
Киирэти кытары иистэнэр сыах, гараж боппуруоһа турбута. Ону Александр Иванович дэлби сүүрэн-көтөн “Саха проект” гарааһыгар сыста саҥа гараж туппуппут. Ол гаражпытын “Строй” тэрилтэ кэлэн сирин атыылаһан ылбыта уонна атын сиргэ гаражта булунун диэбитэ. Онно биһиги автобуска сөптөөх гарааһы Халтурина уулуссаҕа булбуппут. Онон сиэттэрэн хата тыйаатыр бэйэтэ бас билэр туспа гаражтаммыта.
1998 с. Оркестр дьарыктанар аудиториятын, звукооператорскайы онорбуппут. 2005 с. балетнай зал муостатын саҥалыы уларытан тэлгэпиппит. Ол матырыйаалын Табагаҕаттан ЛТП тэрилтэттэн, буруус маһы хайыттаран ылан, мин массыынабынан тиэйэн кэлбиппит. Үлэһиттэр уонча күн саҥа муостаны уурбуттара. Инньэ гынан, балетнай зал сабыс саҥа муосталаммыта. Тыйаатыр артыыстара уонна самодеятельнай үҥкүү кэлэктииптэрэ саҥа муосталаммыттара. Дьарыктанарга табыгастаах этэ.
Сылын ахсын ДК таһын барытын хомуйан, ыраастаан 10 тахса рейс онорон, буор таһан, сибэкки олотторооччубут, киэргэтээччибит. Биир сыл оннооҕор куорат үрдүнэн мэр Илья Михальчук бастыҥ дизайннаах, мастардаах, сибэккилэрдээх площадка аатын ылан Туоһу сурук, Сертификат туппуппут. Наһаа да үөрбүппүт.
Тыйаатырга өр сыл үлэлээбит биллиилээх ырыаһытРаиса Захарова олохтон туораабытын кэннэ Карл Маркс скверигэр өйдөбүнньүк скамейка бастакынан туруорбуппут. Билигин ырыа бырааһынньыга ити скамейкаттан саҕаланар.
Ити курдук Александр Иванович сатабыллаах, булугас-талыгас кэпсэтиилээх, киирбит-тахсыбыт, киэн билиилээх, бэйэтэ көрүүлээх салайааччы этэ. Сэтинньи 17 күнүттэн 1992 сылтан ыла, тыйаатыр тэриллибит күнүттэн, тыйаатырын иһин-таһын көрөн тупсара, оҥотторо сылдьара.
Александр Иванович бүтэһик күнүгэр диэри тыйаатырыгар бэриниилээх, олоҕун анаабыт киһи буолар. Өссө да үлэлиир, элбэх былааннаах, кыахтаах, тыйаатырын өрө тутар, сайыннарар сааһыгар итинник орто дойдуттан соһумардык, эмиска суох буолбута олус хомолтолоох.
Анатолий Алексеевич Алексеев, Үҥкүү тыйаатырын дириэктэрин хаһаайыстыбаҕа солбуйааччыта (1997-2019), СӨ култууратын үтүөлээх үлэһитэ, СӨ култууратын туйгуна, Горнай улуус бочуоттаах олохтооҕо
