Александр Иванович туһунан Үҥкүү театра баар буолуоҕуттан истэбин, билэбин. Сүрдээх интеллигентнэй, үрдүк билиилээх, талааннаах стратег салайааччы. Чахчы да «мягкая сила», санаабытын барытын толорор, үҥкүү театра сайдарыгар, киэн эйгэҕэ тахсарыгар ханнык да улахан мэһэйдэртэн толлубакка иннин хоту сатабыллаахтык салайан испитэ. Ол да иһин театр национальнай статустаннаҕа дии… Уонна салайааччы быһыытынан улэһиттэригэр сыһыана, ити эмиэ киһини сөхтөрөр. Хас биирдиилэрин профессиональнай уонна тус бэйэлэрин сайдыыларыгар сүбэ-ама буоларын, министиэристибэ наградной отделыгар үлэлии сылдьан билбитим.
Кэлин үлэбинэн алтыспытым, 2024 сыллаахха, Татарстаҥҥа Казань куоракка, култуура салайааччыларын идэлэрин үрдэтии кууруска илдьэ сылдьан. Онно Татарстан култууратын министиэристибэтин салайааччыларын кытта көрсүһүүгэ уонна атын регионнар театральный сообществаларыгар биллэр-көстөр, доҕордуу сыһыаннаах, ытыктанар эбит диэн өйдөөбүтүм. Кылгас кэи иһигэр кини Муса Джалиль аатынан Татарскай академическай опера уонна балет театр дириэктэрин солбуйааччытын Ю.П.Ларионовтыын, Марий-Эл Өрөспүүбүлүкэ Правительствотын бэрэссэдээтэлин солбуйааччытын К.И.Ивановтуун, Борис Эйфман театр репетиторын, Үҥкүү театрыгар “Ситим” испэктээк туруорааччытын О.А. Марковтыын, Татарстан култуура миниистирин солбуйааччытын Д.Д. Нафтуллинныын, Башкортостан судаарыстыбаннай академическай симфоническай оркестр сүрүн дирижерын Дмитрий Крюковы кытта көрсөн айар үлэ туһунан кэпсэппитин биһиэхэ кэлэн сэһэргээбитин өйдөөн хаалбыппын.
Кини үлэтигэр наһаа бэриниилээх этэ. Барыта холбоон 42 сыл үлэлээбитэ. 9 сыл устата балет артыыһынан, 33 сыл устата театр салайааччытынан. Төһөлөөх элбэх үлэни көрүстэҕэй? 60 испэктээк, хас эмэ сүүһүнэн үҥкүүлэр турбуттара. Улахан оркестр тэриллибитэ. Ону тэҥэ иис сыаҕа, Бэрдьигэстээҕи муусука үнүстүрүмүөннэрин айан таһаарар мастырыскыай эмиэ театр иһинэн үлэлиир. Гостуруоллар – соҕуруунан-хотунан, илиҥинэн-арҕаанан, дойду бөҕөтүгэр сылдьыбыттара. Ити барыта Александр Иванович Алексеев үлэтэ – онон үтүө киһи аата өр сылларга ааттаныа….
Надежда Егоровна Сивцева
Геокультурнай сайдыы үнүстүтүүтүн кадр бэлиитикэтин уонна үөрэхтээһин салаатын салайааччыта
