Бу дьыл кулун тутар 5 күнүгэр Үнкүү тыйаатырын салайааччыта Алексеев Александр Иванович соhуччу бу сиртэн күрэннэ……
Мин, Пахомов Петр Степанович, Марыыйа уонна Баhылай Мохначевскайдар ааттарынан Өрөспүүбүлүкэтээҕи саха муусука үнүстүрүмүөннэрин оҥорор мастарыскыай дириэктэринэн үлэлии сылдьан Александр Ивановичтыын араас мунньахтарга сылдьан билсэн кэпсэтэр этибит. «Айхал» киинэ тыйаатырыгар Үҥкүү тыйаатыра үлэлии олордохторуна, миигин кэлэ сырыт диэн ыҥырбытын ылынан тиийбитим, киирэр аан аттыттан Александр Иванович, үөрэ-көтө көрсүбүтэ. Хайдах үлэлии олороллорун, хас үлэлиир кабинетын барытын көрдөрбүтэ. Саха норуотун уус-уран оҥоhук үнүстүрүмүөнүн оҥорор мастарыскыайын уонна саха национальнай аркыастырын биир тэрилтэҕэ түмэр туhунан кэпсээтии барбыта. Онно билбитим Александр Иванович саха төрүт үнүстүрүмүөнүн, аркыастырын наhаа күүскэ кыhалларын, сайдарын, бэриниилээҕин билбитим.
2017 с. тохсунньу ыйга Александр Иванович: «Дьэ, сонуннаахпын, мастарыскыай Үҥкүү тыйаатырыгар холбоhуох курдук буолла», — диэн иhитиннэрбитэ. Ис санаатыттан наhаа үөрбүт этэ, баҕа санаата туолан буолуо….
Ити 2017 с. олунньу ыйтан икки өттүбүтүттэн бэлэмнэнии бөҕөтө буолбута, элбэх мунньахтарга сылдьыбыппыт. Александр Иванович докумуоннары сиhилии үөрэппитэ, мастарыскыай төhө иэстээҕин, докумуоннары барытын үөрэппитэ. Мастарыскыай Үҥкүү тыйаатырын иhинэн Художественная мастерская по созданию и реставрации национальных музыкальных инструментов диэн структурнай подразделение буолбуппут. Александр Иванович мастарыскыай Үҥкүү тыйаатырыгар холбоноругар биир да иэhэ суох диэн, хойукка дылы учугэйдик саныыра.
Бу 8 сыл Александр Иванович салайыытынан, олус сатабыллаахтык үлэлээн кэлбиппит.
«Петр Степанович, Эн мастарыскыай салайааччыта буоларгынан, саха национальнай аркыастырын кытта Арассыыйа араас куораттарынан, мастарыскыай үлэтин-хамнаhын туhунан билсиhиннэриэххин баҕарабын», — диэн Красноярск, Улан-Удэ куораттарынан, быыстапкалаан, Төгүрүк остуоллаан үрдүк таhымнаахтык сылдьан кэлбиппиттэн киэн тутунабын. Өссө да былааммыт элбэх этэ….
Александр Иванович, күн аайы мастарыскыай үлэтин билсэ олорбута. Тымныы күннэргэ наhаа долгуйара, истопниктары доруобуйаларын кытта ыйыталаhара, маспыт, чохпут тиийэр ду диэн ыйытааччы. Биир баҕа санаата 2024 с. балаҕан ыйыгар мастарыскыайга өр туруорсан күөх төлөн уота киириитэ.
Аны, хас кыбаартал аайы бэйэтэ кэлэн мастарыскыайы көрөн, мунньахтаан, туох матырыйаал тиийбэтин, быhаарсааччы, үлэhиттэр дьиэ кэргэннэригэр баҕа санаатын тиэрдээччи.
Мастарыскыай үлэhит уолаттарын наhаа өрө тутар этэ, туох баар общественнай, культурнай, спортивнай тэрээhиҥҥэ Үҥкүү тыйаатырын аттыттан кыталларын иhин.
Александр Иванович олорбут олоҕо, үлэлээбит үлэтэ, үйэлэргэ ахтылла турдун, олорон ааспыт олоҕо үтүө холобур буоллун.
Пахомов Петр Степанович – мастарыскыай салайааччыта, СӨ уус- уран оноhуктарын маастара
